من شو بيشكي الـ (ر. ف. ك)؟ من شو؟.. أو خلّيني اسأل: من شو بيشكو أساتذة الـ (ر. ف. ك)؟؟

أكيد ما بيشكو الشباب من شي.. أو الأصح: كانو يشكو كتير وينقّو كتير قبل خمس ست سنين؛ واليوم صار بينشكى منّون! ومنّون مضطرين يشكو وينعو وينقو. أصلاً ما عندون وقت فراغ للشكوى!!.. يا حراااام كيف سرقتون الدروس الخصوصية، وصارو محشوكين بـ 9ساعات “خصوصي” باليوم، على مدار الصيفية فقط لا غير!!.. انّو يعني 300، 400، 500ألف ليرة ما بتعوّضون على هيك “حشكة”؟؟!!.. أكيد بتعوّض وبتزيد (بلا حسادة وبلا ديقة عين).

صرلي عشر سنين وأنا عم بحكي.. طلع الشعر ع لساني وأنا عم بحكي: يا ابني يا عيني يا روحي، شو بدك تصير بالمستقبل؟

ـ بدّي صير استاذ

استاذ؟!.. لازم تصير دكتور.. دكتوووور

إنو هلق كيف بدّي اعتذر من ابني على ها العشر سنين اللي سمّعتو فيها شي مية ألف مرة كلمة دك تور (كلمة وحدي)؟!..

كيف بدّي فهّمو انّو 3/4 الدكاترة صارو عم بيكشّو دبان أو عم يلعبو شدّة ع الكمبيوتر!

كيف بدّي اقنعو انّو صحيح لقب د (دال) فيه وجاهة وهيبة وحضور أكتر من لقب أ (ألِف)، بس ألف أستاذ ولا يقولو دكتور دلّ يا خديجة!

شوف المعادلة كيف انقلبت رأساً على عقب (ومش ضروري تكون ري. في. كاف حتى تفهم بالمعادلة):

بالماضي، كان لازم تكون أكتر من (ري. في. كاف) حتى تزور الدكتور وانت مش خايف على جيبتك! واليوم لازم تكون أكتر من دكتور حتى تزور الـ (ري. في. كاف) وانت خايف على جيبتك!!

هادي هيي المعادلة مقلوبة، والمجهول واحد هوّي: ابني أو ابنك، اختي أو اختك… واخت البيزلّ عليك بحرف!

……..

ماهر سلوم