ليش معصّب يا بابا؟.. ليش معصّب ع الماما وع البابا يا بابا؟.. ولووو ولو يا ابني!..

شو يعني صرت شب وراسك بيدقّ جرن كبة وبتحلف بشواربك؟ شو يعني؟!.. ما الماما أمك بتعرف همّك، والبابا بيّك متل خيّك.. هلّق ما تغزّك شوكة، مين فكرك رح يوقّف جنبك؟! مين؟.. ملحم زين أو هيفا وهبي يلّي معلّق صورون ع الحيط؟! ولاّ فكرك SyriaTel رح يدمعو عيونا وتبعتلك message بالسلامة ع موبايلك “الدمعة”.. ولاّ فكرك Le garcon تبع الأركيلة رح يجي ويعمّرلك المعسّل؟!..

هلّق أمك، من دون شك، دقة قديمة بالنسبة لألك!.. انو يعني لازم تتركك ع خربطلك حتى تكون دقة جديدة؟! ما انت بتكره دقة أمك، وما بتاكول غير دقة مقاصف.

أمك (وحياة أمك ع الغوالي) بتكره البروستد والهامبرغر والمايونيز والكاتشاب، وانت يا بابا بتموت فيون! ومنشان ما تموت منّون، حلفت أمك ما بيفوتو بيتها والسما زرقا. ما هيّ أمك صحيح دقة قديمة، بس هيّ بتعرف، وانت ما بتعرف، انو الهامبرغر فيه بلاستيك والكاتشاب داخلّو كاوتشوك!!.. ولك يا بابا اسمع كلام أمك!.. وإذا ما بينبلع معك، حط عليه كاتشاب!!..

وبيّك، يا بابا، ما بيستاهل ربع ساعة من وقتك؟.. يعني عن شو بيحكيك بيّك حتى تعصّب وتقطّب حواجبك؟!.. شو هوّي عم يشرحلك (قصة الحضارة) ولاّ (مقدمة ابن خلدون) ولاّ (مذكّرات الجنرال جوكوف)!!.. بيّك يا بابا عم يحكي بالعموميات عن العلم والعمل والكرامة! كفر بيّك يعني؟!.. ولك يحرق حريشك يا بابا، ما حضرتك مضيّع 3/4 وقتك ع الأغاني والفيديو كليبات والدعايات، استكترتها الـ 1/4 ساعة تبع بيّك؟!.. عا القليلة بيك ما عم بيسوّق لمنتج حقو مصاري.. عم يحكي الزلمي عن شوية علم وشوية عمل وشوية كرامة!!.. صحيح حكي بيك مانو مزوّق ومزهزه وما فيه نسوان مقصّرا فوق الركبة بشبرين وشبر، بس الزلمي شاريك ومنّو بايعك!!..

مش ضروري يا بابا تضحك بس ع النكتة الحلوة.

فيك تسمع النكتة، ولو كانت بايخة، وتضحك.. المهم تضحك يا بابا!!

وبلا متعصّب ع الماما وع البابا.

وحياتك.. وحياة الغوالي.. وحياة الكاتشاب اللي بتموت فيه حضرتك:

حكي الماما والبابا أطيب من الكاتشاب بشبرين وشبر!!

…………..

مهداة إلى الأستاذ رفيق الحسني